דו מיינסט עס נישט אמת'דיג? אויב אזוי נעם די תורה
דעם שבועות גייען מיר ליינען ווי די אידן האבן געזאגט נעשה ונשמע, דאס מיינט אז זיי האבן זיך מקבל געווען אנצונעמען די תורה, און אלעס וואס דער אויבערשטער הייסט, נאך פאר זיי האבן געוואוסט וואס דאס איז, און צו זיי וועלן דאס קענען אויספירן אדער נישט, און דער אויבערשטער האט דאס זייער מחשיב געווען, און אלע ספרים רעדן ארום פון די גרויסקייט אז די אידן האבן דאס געזאגט, אבער מיר איז נתחדש געווארן אן אינטערעסאנטן חידוש וואס קען זייער צוניצקומען פאר אונז מיט אונזערע שוועריגקייטן.
שטעל זיך פאָר דו גייסט אויף א אינטערוויא פאר א דזשאב, און יענער וויל זעהן אויב דו ביסט פאסיג צו באקומען דעם דזשאב, הייבט ער דיר אן אויסצופרעגן וואס דו קענסט טוהן און וואס נישט, און דו קומסט מיט א ענטפער, איך בין גרייט צו טון אלעס אין דער וועלט, אבער געב מיר די דזשאב !!!
וואלסטו באקומען די דזשאב אדער נישט? אוודאי אז נישט, ווייל אז דו זאגסט אז דו קענסט אלעס מיינט עס אז דו קענסט גארנישט, און דו זוכסט נישט באמת צו טוהן דעם דזשאב, ווייל דו ווייסט נישט צו דו קענסט דאס טוהן, דו זוכסט נאר צו באקומען דעם דזשאב, כדי צו באקומען די פעי טשעק סוף וואך, און אהיים ברענגען אפאר דאלאר פאר דיין משפחה, אבער דו וועסט נישט טוהן דיין דזשאב בשלימות, און ממילא וועסטו נישט באקומען דעם דזשאב.
אויב אזוי לאמיר אריינטראכטן וואס איז געווען ביי מתן תורה, דער אויבערשטער פרעגט אויב ענק זענען גרייט צו נעמען די תורה, און מקיים זיין אלע מצוות, און דו ענטפערסט יא, וואס מיינט דאס ? דאס מיינט אז דו האסט נישט איבער געטראכט אויב דו קענסט אדער נישט, און דו נעמסט אן די תורה ווייל דו ווילסט די שכר וואס דער אויבערשטער האט צוגעזאגט פאר זיין תורה, אויב אזוי פארוואס האט דער אויבערשטער אונז געגעבן די תורה.
מיט א געוויסע מאס זענען מיר דאך אסאך ערגער פון די גוים וואס האבן פארשטאנען אז זיי קענען נישט איינהאלטן די תורה, און זיי האבן זיך נישט געפאפט, נאר זיי האבן געזאגט אז קענען עס נישט נעמען, און מיר פאפן זיך אליין אז מיר קענען נעמען די תורה, און מיר רעדן זיך נאך איין אז מיר האב געפאפט דעם אויבערשטן אויך, אז ער האט אונז געגעבן די תורה אויף אזא אופן ?
דער תירוץ איז דער אויבערשטער האט אונז אויסגעקליבן פאר זיין פאלק ווייל אונז האט ער געוואלט, און ער האט זייער גוט געוויסט ווען ער האט אונז געגעבן די תורה, אז אפילו מיר האבן געזאגט נעשה ונשמע מיינט עס גארנישט, אזוי ווי חז"ל לערנען אונז אז בשעת מתן תורה האבן די אידן שוין געקוקט מיט איין אויג צו עגל, און מיט דעם אלעם האט זיי דער אויבערשטער געגעבן די תורה, ווייל דער אויבערשטער האט געזאגט, איך האב א תורה פאר אזעלכע אידן אויך, און איך האב פאר זיי אויך א וועג, און דוקא פאר זיי וויל איך געבן די תורה, ווייל די תורה וועט זיי ברענגען אז זיי זאלן ווערן אמת'דיגע געטרייע איבערגעגעבענע אידן פאר מיר און פאר מיין תורה, און אדרבה הייבטס אן לערנען די תורה און מקיים זיין די מצוות וויאזוי עטס קענטס און איך וועל ענק שוין טראגן ווייטער.
לענינינו, וויפיל מאל האבן מיר שוין איינגעזעהן אז אונזערע נסיונות באגראבן אונז, און מיר קענען נישט אזוי אנגיין ווייטער, און לכבוד דעם האבן מיר געמאכט א פעסטע החלטה "עד כאן" דאס איז עס. איך גיי מער נישט קוקן וואס מען טאר נישט, איך גיי מער נישט טוהן וואס מען טאר נישט, איך גיי מער נישט טראכטן וואס מען טאר נישט, אבער נישט לאנג שפעטער איז געווען מפטירין כדאתמול, מען איז ווידער אדורך געפאלן, מען האט ווידער געטראכט געקוקט געטוהן וכו', יעדער איינער אין זיין מקום הנסיון, און דער מענטש טראכט איך בין דאך פשוט א שקרן, איך נעם זיך אונטער איינמאל און נאכאמאל, און איך רעד זיך איין אז איך וועל עס קענען אויספירן, פשוט נאר ווייל עס מיר שווער די פלאץ ווי איך בין אריינגעפאלן, עס איז מיר שווער די חרבנות וואס די נסיונות ברענגען מיר, אדער די שווערע עונשים וואס ווערן געברענגט אין חז"ל אויף מיינע דורך פעלער און אויף מיינע עבירות.
אבער איך האב קיינמאל נישט געוואלט קוקן אין טראכטן אפשר בין איך נישט אין קאנטראל איבער זיי, אפשר קען איך פשוט נישט אליין אויספירן מיינע גוטע קבלות, אפשר ווייס איך נישט וואס איז די ריכטיגע וועג וויאזוי צו צוגיין צו דעם פראבלעם, נאר איך האב מיר אייביג איינגערעדט, אז איך קען יא, און איך האב געפאפט מיר אליין, און זיך איינגערעדט אז איך האב געפאפט דעם אויבערשטן אויך.
אבער דא קומט דער אויבערשטער און ער זאגט, איך ווייס פונקטליך ווי דו האלסט, און איך זעה פונקטליך וואס דו טוסט, איך האב א וועג פאר דיר אויך, דו טוה ווייטער דיינס, איך וועל דיר שוין ברענגען צו א פלאץ ווי דו וועסט איינזען אז דו קענסט באמת גארנישט, און דעמולטס וועל איך אריינקומען אין דעם בילד, און איך וועל איבערנעמען די לייצעס, און איך וועל דיר טראגן אויף א וועג פון ריקאווערי, אז דו זאלסט ווערן א אמת'דיגע איבערגעגעבענע איד פאר מיר, דו זאלסט מער נישט טראכטן פון דיר, נאר דו זאלסט טראכטן פון מיר און פון מיין רצון, אז איך זאל קענען טון און בויען מיט דיר וואס איך וויל, און דו זאלסט טוהן מיין רצון און נישט דיין אייגענע רצון.
און ממילא אחי חזק ואמץ גיי אן ווייטער, דער אויבערשטער האט א וועג פון ריקאווערי פאר מיר, און פאר דיר, און פאר אונז אלע, זיי גרייט ווייל דער טאג וועט קומען, וואס דער אויבערשטער וועט דיר זאגן, דיין צייט איז שוין געקומען, און פון יעצט אן וועסטו שטיין ביי דיין ריכטיגע וועג פון ריקאווערי, און די תורה וועט די אויסלערנען דיין ריכטיגע וועג צו בלייבן ריין.
(קרעדיט: הייליגער צדיק)
