500 ריינע טעג!

פ-י-נ-ע-ף ה-ו-נ-ד-ע-ר-ט! דאס איז די נומער פון טעג וואס דער באשעפער האלט מיר שוין ריין איין טאג אויף אמאל. דאס זענען חסדים שלא כדרך הטבע. עס גלייבט זיך מיר אליין נישט אז דאס האט געקענט געשען. פאר מיר - דער זעלבער וואס האט געמיינט אז ער קען נישט זיין ריין מער ווי צוויי דריי טעג - האט דער באשעפער געוויזן וואונדער איבער וואונדער אז ער קען מיר יא האלטן ריין. הודו לד' כי טוב כי לעולם חסדו. אודה ד' מאד בפי ובתוך רבים אהללנו.

איך וויל דא באדאנקען אלע וואס זענען דא מיט מיר, ובתוכם די מייסדים פון הד"א און GYE. דער באשעפער זאל אייך בענטשן מיט אלעם גוט'ן, ותהי משכורתכם שלימה מעם ד'.

אויך וואונטש איך נאך און נאך ריינע טעג פאר אונז אלע חברים דא, אלע אינאיינעם.

איך בין געווארן א נייער מענטש!

פון ווי נעמט מען די הארץ, און פון ווי נעמט מען די טינט ארויסצוברענגען וואס הד"א האט פון מיר געמאכט, אלעס אין זכות פון די טייערע חברים הנמצאים פה, ברוך השם. מה נדבר ומה נספר, ווי הייב איך בכלל אן? איך וויל אייך דערציילן חשובע ליינער אז איך בין א איש אחר לגמרי, מיין דאווענען איז מיט אמתע מחשבה, מיין גיין אין גאס גייט זיך אינגאנצען אנדערש, שמוציגע קליפס ציען נאך טאקע, אבער איך בין מער נישט געצווינגען צו קוקן, מיין שלום בית פליסט על מי מנוחות, און כמעט וואס אסאך שווערע נסיונות האב איך שוין כמעט נישט. בקיצור, א גן עדן אויף דער וועלט במלא מובן המילה, עס איז א געשמאקע לעבן, און כאטש וואס איך בין נישט קיין כולל אינגערמאן, קען איך זיך אבער באמת פאריפן א בן תורה, א בן וואס פאלגט די תורה און זיין טאטע אין הימל.

ואילו פינו מלא שירה כים וואלט איך נישט געקענט גענוג ארויסברענגן מיינע דאנק געפילן צו די חשובע אנפירער פונעם הייליגן און קריטישן סייט, א סייט וועלכע מוז עקזעסטירן!!!, טייערע חברים, פראבירט מיר נאכצומאכן, איך זאג אייך צו איר וועט זיך אליין נישט דערקענען.

דריי יאהר ריין!

איך וואלט עס קיינמאל נישט געגלייבט!

ברוך שהחיינו וקיימנו...

דער אייבישטער האט געמאכט מיט מיר א וואונדערליכע נס, איך בין אלט געווארן דריי יאר אין מיין נייע ריינע לעבן, א שמוציגע לעבן הייסט נישט געלעבט. איך בין ליידער געלעגן אין שמיץ פון אלס קינד פון 5-6 יאר אלט, און איך האב נישט געגלייבט אז איך קען אמאל ווערן ריין, אבער דער אייבישטער האט באוויזן דעם גרויסען נס.

א ספעציעלע יישר כח פאר מיינע חברים וואס האבן מיר געהאלפן און פאר יעדער וואס שרייבט דא, ווי אויך פאר אלע וואס העלפן אז הד"א זאל עקזעסטירן.

זאל דער אייבישטער שענקן א ריינע טאג פאר מיר און פאר דו גאנצע חבריא, "כל יום ורק להיום".